ತೆರೆ

ಒಂದಿಷ್ಟು ಕ್ರಮಿಸಬೇಕು
ಬೆರಳ ಸಂಧಿಯೊಳಗೆ ಬೆರಳು
ಸೇರಿಸಿ ನೇಲ್ ಗಳು ಪುನಃ
ಪಾಲಿಶ್ ಕಾಣಬೇಕು ಇನಿಯ
ಅದೇ ಜೋಡಿ ಹೆಜ್ಜೆ ಒಂದಾಗಿ
ಮುಖದ ಪೌಡರ್
ಬಣ್ಣ ಕಳೆಯುವವರೆಗಾದರೂ

ಎಲ್ಲದಕ್ಕೂ ಮರಲಿ ರೆಕ್ಕೆ
ಮೂಡಬೇಕು ಹಾರಿದಂತೆ
ನನಗೆ ಮಾತ್ರ ಗೊತ್ತಾಗುವ
ಭಾವವೊಂದಿದೆ ಗೆಳೆಯ
ಚಿಗುರಬೇಕು ನೀನು ಮುಚ್ಚಿಟ್ಟ
ಅವೆಲ್ಲ ನಗೆಗಳನ್ನು ಕದ್ದು
ನಾ ನೋಡುವಂತೆ

ಮಾತುಕತೆಯನ್ನೆಲ್ಲ ಮಡಚಿಯಿಟ್ಟ
ತರುವಾಯ ಮೊದಲು ಗರಿಗೆದರಿದ
ಆಸೆಯೊಂದಿದೆ ನಾನೇ
ಬಿಡಿಸಬೇಕೆಂದಿರುವ ಚಿತ್ರ
ಸುಳ್ಳಿನಲ್ಲೇ ಕೊಳೆಯುತ್ತಿರುವ
ಅಂತರಂಗದ ನೀ ಅರಿಯದ್ದು

ಬರಬೇಕು ಮನ್ವಂತರ
ಈಗಲೂ ಹಪಿಹಪಿ ನನಗೆ
ಹುಂಬತನದ ಪರಮಾವಧಿ
ಕೇಳಿಸದ ಒಡೆದ ಕೂಗು
ನಾನಗಲಾರದ ಅನಿಶ್ಚಿತತೆ

ಕಳಚಿದ ದಾವಣಿ ಮಾತ್ರ
ಇನ್ನೂ ನಗುತ್ತಿದೆ

ಅವಿಜ್ಞಾನಿ