ಹೀಗೊಬ್ಬಳ ಸ್ವಗತ

ಗೂಟಕ್ಕೆ ಬಡಿದ ಅಪ್ಪನ ಹೆಣದ ಮುಂದೆ ಮಗಳು ಹಲುಬುತ್ತಿದ್ದಾಳೆ..
ಬಂದವರೆಲ್ಲಾ ಸಂತೈಸಲಾಗದೆ ದುಃಖ ಹೊತ್ತು
ತಂದವರಂತೆ ನಿಟ್ಟುಸಿರು ಬಿಡುತ್ತಾರೆ..

ಇಲ್ಲೊಬ್ಬ ಅನಾಥವಾದವಳ ಬಗ್ಗೆ ಚಿಂತಿಸಿ ಸೇಂದಿ ಗುಟುಕೇರಿಸಿ ನಿರಾಳವಾಗಿ ಗಿಡದ ಬುಡಕ್ಕೆ ಅಡ್ಡಾಗಿದ್ದಾನೆ..
ಇನ್ನೊಬ್ಬ ಅವನ ನೋಡಿ ಮುಗುಳ್ನಕ್ಕು
ಮುಂದೆ ಹೋದ... 

ಗಂಡನ ಹೆಣಕ್ಕಚ್ಚಿದ ದೀಪದೊಳಗೆ ಹರೆಯ
ತಿರುಗಿದ ಮಗಳ ಬದುಕು ಕಟ್ಟುತಿದ್ದಾಳೆ...
ಅಣ್ಣಾನಾದವನು ಹೆಂಡತಿ ಸೆರಗಿನೊಳಗೆ  ಅವಿತುಕೊಂಡಿದ್ದಾನೆ...

ತಮ್ಮನಾದವನು ಹಸಿವನ್ನು ತಾಳದೆ ಅಳುತ್ತಾ ಅಕ್ಕನಿಗೆ ಕಣ್ಣಸನ್ನೆ ಮಾಡಿ ಕಣ್ಣೀರಿಟ್ಟನು..
ಹಸಿದ ಹೊಟ್ಟೆಯ ಅಳು ಅಪ್ಪನ ಶವದ
ಮುಂದೆ ಕಿವಿಗೊಡದೆ ಹೋಯ್ತು...

ಹೆಂಡತಿ ಮುಡಿದ ಮಲ್ಲಿಗೆ ನಿಟ್ಟುಸಿರು ಬಿಡುತ್ತಿದೆ
ಮುತ್ತೈದೆಯ ಕೊನೆಯ ನಡಿಗೆ ಗಂಡನ ಹೆಣದ ಮೆರವಣಿಗೆಯಲ್ಲಿ ಕೊನೆಯಾಗುತ್ತಿದೆ..
ಬಂದವರೆಲ್ಲಾ ತಿರುಗಿ ನೋಡದೆ ಹೋದರು
ಮತ್ತೆ  ಅವಳು ಅನಾಥಳೆ. ..

ಹುಚ್ಚು ಹುಡ್ಗಾ